TOShKENT, 1 fev — Sputnik. Toshkent hayvonot bog‘ida ona 3 yoshli qizini ayiqlar volyeriga tashlab yuborganligi bilan bog‘liq bo‘lgan jinoyat ishi yuzasidan tergov olib borilmoqda.
Bosh prokuratura matbuot xizmati ma’lum qilishicha, ish bo‘yicha ayblanuvchi tariqasida jalb qilingan ayol 2021-yilning iyul oyidan buyon ruhiy asab kasalliklari dispanserida ro‘yxatda turganligi ma’lum bo‘ldi.
Ayblanuvchining jinoyat sodir qilgan paytdagi ruhiy holatini aniqlash yuzasidan tergov organi tomonidan sud-psixiatriya ekspertizasi tayinlandi.
Tergov harakatlari davom etmoqda.
Bundan avval Mahalla va oilani qo‘llab-quvvatlash vazirligi qizini ayiq qafasiga tashlab yuborgan ayol haqida ma’lumot berdi. Z.T. ismli ayol va 31 yoshda. Toshkent shahrining Sergeli tumanida istiqomat qiladi.
Ayol 2018-yilda tug‘ilgan qizi va yana bir farzandi bilan otasining uyida yashab kelmoqda.
Ayol Toshkentdagi oliy o‘quv yurtlaridan birida o‘qituvchi bo‘lib ishlaydi. Turmush o‘rtog‘i Rossiyaga ketgan va hozir u bilan birga yashamaydi. Shu sababli ayol ruhiy tushkunlikka tushib qolgan.
Mutasaddilar ajralish yoqasiga kelib qolga fuqaro Z.T.ning oilasini yarashtirish choralarini ko‘rishgan.
Z.T. 2021-yilda "ayollar daftari"ga kiritilgan va unga uy-joy va ajrim masalasida zarur huquqiy maslahatlar berilgan. Shuningdek, homiylik mablag‘lari hisobidan uning oilasiga ikki bor oziq-ovqat mahsulotlari yetkazib berilgan.