TOShKENT, 14 dek — Sputnik. Koronavirusning yangi "omikron" shtammi dunyoda shaxdam qadamlar bilan tarqalib kelayotgan bir vaqtda Xitoy kompaniyasi o‘z vaksinasining yangi "omikron" shtammiga qarshi samaradorligini ma’lum qildi. RIA Novosti xabariga asosan.
Anhui Zhifei Longcom Biopharmaceutical kompaniyasi o‘tkazgan laboratoriya sinovlariga ko‘ra, kompaniyaning rekombinant vaksinasi koronavirusning "omikron" shtammiga qarshi "yuqori samarador" deb topilgan.
"Xalqaro ko‘pmarkazli izlanishlarning uchinchi bosqichi bizning rekombinant vaksinamizning koronavirus infeksiyasiga qarshi 81,43 % samaradorlik darajasini namoyish qildi. Shuningdek, vaksina (ZF-UZ-VAC 2001) o‘limdan - 100%, "delta-shtamm"dan - 80% darajasida samaradorlik namoyish qildi", - deyilgan xabarda.
Eslatib o‘tamiz, Xitoyning Anhui Zhifei Longcom Biopharmaceutical kompaniyasi Uzbekistonni vaksina ishlab chiqarishda qo‘shgan hissasi uchun - hammuallif deb tan olgan va O‘zbekistonga ushbu vaksinani maxsus shartlar asosida yetkazib berishga rozi bo‘lgan.
Bugungi kunda ZF-UZ-VAC 2001 vaksinasi O‘zbekiston hududida eng ko‘p qo‘llanilayotgan vaksina hisoblanadi. Ushbu vaksinadan O‘zbekistonga salkam 38 mln doza olib kelingan.
O‘zbekistonlik shifokorlar kuzatuviga ko‘ra ZF-UZ-VAC 2001 - inson organizmiga juda yumshoq ta’sir qiladi va shu vaqtga qadar deyarli birorta ham salbiy reaksiya berish holatlari kuzatilmagan. Shu bilan birga koronavirus infeksiyasiga qarshi yuqori samaradorlik namoyish qilgan.
"Omikron" shtammi
Ilk bor 11-noyabr kuni Botsvanada aniqlangan "omikron" shtmmi undan so‘ng JARda,keyin Gonkong va boshqa davlatlarga tez tarqalib ketgan edi. Bugungi kunda "omikron" shtammi dunyoning 63 mamlakatida aniqlangan.
Hozirshga qadar o‘tkazilgan izlanishlar natijasida omikron shtammining o‘ta yuqumliligi, koronavirusning boshqa shtammlaridan ustun kelishi aniqlangan. Masalan JARda "omikron" paydo bo‘lganidan so‘ng bir oy ichida "delta" shtammni siqib chiqargan.
Rossiyalik virusologlarning dastlabki xulosasiga ko‘ra "omikron" shtammi "tabiiy vaksina" bo‘lishi mumkin. Chunki koronavirusning ushbu shtammi bilan kasallanganlarda kasallikning og‘ir kechishi yoki o‘lim holatlari juda kam uchraydi. Lekin "omikron"ga chalinib keyin tuzalganlarda koronavirusning boshqa shtammlariga qarshi immunitet paydo bo‘ladi.