TOShKENT, 2 dek – Sputnik. Toshkent viloyatida aholini koronavirusga qarshi qo‘shimcha (buster) doza bilan emlashda Rossiyaning “Sputnik Layt” vaksinasidan foydalanilmoqda. Bu haqda Sanitariya-epidemiologik osoyishtalik va jamoat salomatligi xizmati xabar bermoqda.
Viloyatning Yuqori Chirchiq tumanida joylashgan “Ariran” pansionatida 26 nafar 65 yosh va undan yuqori fuqaro buster doza sifatida “Sputnik Layt” bilan emlangan.
Ta’kidlanishicha, koronavirusga qarshi buster doza bilan emlanish haqida respublikaning barcha hududlarida keng ko‘lamli tushuntirish ishlar olib borilmoqda.
Avvalroq Toshkent shahrida koronavirusga qarshi “Sputnik Layt” vaksinasi bilan emlash boshlagani xabar qilingan edi.
Eslatib o‘tamiz, O‘zbekistonda 17-noyabrdan to‘liq emlangan fuqarolarni buster (qo‘shimcha) doza bilan ixtiyoriy emlash boshlangan.