TOShKENT, 24 okt – Sputnik. Xorazm viloyatida quyma platina va simob suyuq metalining noqonuniy oldi-sotdisiga chek qo‘yildi. Bu haqda Davlat bojxona qo‘mitasi matbuot xizmati xabar qildi.
DXX xodimlari ishtirokida Urganch shahrida o‘tkazilgan tezkor tadbirda avvaldan kuzatuvga olingan shaxs og‘irligi 1 kg. 22 gr.ni tashkil qiluvchi 1 dona platina quymasini va salkam 514 gr. og‘irlikdagi zaharli simob moddasini sotishga uringan vaqtida ushlangan.
U platina quymasini 30 ming dollarga, simobning har bir gramini 1000 dollardan hisoblab, jami 500 ming dollarga sotishni ko‘zlagan.
Qonunbuzar shaxsdan olib qo‘yilgan platina va simobning umumiy qiymati 1 mlrd 128,5 mln so‘mni tashkil qilmoqda.
Tergovga qadar tekshiruv harakatlari olib borilmoqda.