TOShKENT, 27-iyul — Sputnik. Bugun O‘zbekiston Respublikasi prezidentining Afg‘oniston bo‘yicha maxsus vakili Ismatulla Irgashev Rossiya Federatsiyasining mamlakatdagi Favqulodda va Muxtor Elchisi Oleg Malginov bilan uchrashdi.
Muloqotda Afg‘onistondagi mavjud vaziyat va xalqaro hamjamiyatning sa’y-harakatlari, shuningdek, afg‘on masalasida ikki tomonlama hamkorlikni kengaytirish boʻyicha atroflicha fikr almashildi.
Rossiya elchisi Afg‘onistonda uzoq muddatli va barqaror tinchlikni o‘rnatishda, shuningdek, mintaqaviy integratsiya jarayonlariga mazkur davlat ishtirokini ta’minlashda O‘zbekistonning muhim rolini ta’kidladi.
O.Malginov ikki tomonlama munosabatlarni yuqori baholadi. Shuningdek, natijalari mintaqalararo aloqani mustahkamlashga xizmat qiladigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” xalqaro konferensiyasini (2021-yil 15-16-iyul) muvaffaqiyatli o‘tkazilgani bilan tabrikladi.