TOShKENT, 25-iyul — Sputnik. Jahongir Otajonovga nisbatan ochilgan ish sudga yuborildi, deb xabar qildi poytaxt IIBB matbuot xizmati.
Xabarda aytilishicha, Jahongir Otajanov Ichki ishlar vazirligi tizimi xodimlarini haqorat qilgan videomurojaatini joylashtirib, xodimlarning sha’ni va qadr-qimmatini beodoblik bilan qasddan taxqirlagan. Uning xatti-harakatlariga qonuniy baho berish maqsadida o‘tkazilgan tergovga qadar tekshiruv jarayonida, u yuqoridagi videomurojaatida aytib o‘tgan haqoratli gaplarni jahl ustida aytganini, Respublika hukumati va ichki ishlar organlari xodimlariga nisbatan hech qanday shaxsiy adovati yo‘qligini ta’kidlab, qilgan ishidan pushaymonligini bildirgan.
Qayd etilishicha, uning qilmishida Ma’muriy javobgarlik to‘g‘risidagi kodeksning 41-moddasi (Haqorat qilish)da ko‘rsatilgan huquqbuzarlik alomatlari mavjudligi sababli to‘plangan hujjatlar 23-iyul kuni jinoyat ishlari bo‘yicha Shayxontohur tumani sudiga taqdim etildi.