TOShKENT, 12-iyun — Sputnik. “UzAuto Motors” Tojikistonda avtomobil yig‘ishni yo‘lga qo‘yadi. Bu haqda kompaniya matbuot xizmati xabar berdi.
Ma’lum qilinishicha, Tojikistonning Boxtar shahrida bo‘lib o‘tgan birinchi O‘zbekiston – Tojikiston hududlararo investitsiyaviy forumida “UzAuto Motors” AJning yengil avtomobillarini ishlab chiqarish "Auto Motors Tadjikistan" qo‘shma korxonasini tashkil etish bo‘yicha bitim imzolangan.
Mazkur loyiha 2021-yilning 21-aprel kuni Tojikiston sanoat va yangi texnologiyalar vaziri – Sherali Kabirning O‘zbekistonga tashrifi chog‘ida erishilgan.
Unga ko‘ra, 5-7 may kunlari “O‘zavtosanoat” AJ tomonidan ishchi guruh Tojikistonda bo‘lib, hamkor “AlyuminSoxtmon” kompaniyasining ishlab chiqarish quvvatini o‘rganib, qo‘shma korxona yaratish bo‘yicha muzokaralar olib borib qaytgan.
Umumiy qiymati 2 mln dollarni tashkil qilgan loyihaning dastlabki bosqichida ishlab chiqarish hajmi 10 000 dona transport vositasini tashkil etadi. Kelgusida uni 35 000 donaga oshirish rejalashtirilgan.