TOShKENT, 29-may - Sputnik. Xorazmda "Neksiya" avtomobili haydovchisi boshqaruvni yo‘qotishi natijasida mudhish yo‘l-transport hodisasi sodir bo‘ldi, to‘rt kishi YTH qurboniga aylandi. Bu haqda "Xorazm" telekanalining "Jinoyat va adolat" ko‘rsatuvida ma’lum qilindi.
Xabarda aytilishicha, Yangiariq tumani "Achchiquyi" mahallasida yashovchi 1982-yilda tug‘ilgan shaxs 24-may kuni kechga tomon "Neksiya-2" avtomobilini boshqarib ketayotib Yangiariq—Xonqa yo‘lining 14-kilometrida yo‘l chetidagi tumandagi maktablarning birida tahsil oluvchi 6 nafar 11-sinf bitiruvchilarini urib yuborgan.
Avtomobilning o‘zi esa yo‘l yoqasidagi ariqqa ag‘darilib tushgan.
Avariya oqibatida jabrlanuvchilarning 3 nafari voqea joyida, yana bir nafari esa shifoxonada olgan tan jarohatlari oqibatida vafot etgan. Shuningdek, ikki nafar o‘quvchi og‘ir tan jarohatlari bilan shifoxonaga joylashtirilgan.
Haydovchiga nisbatan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.