TOShKENT, 28-may — Sputnik. 2021-yil 1-aprel holatiga davlat qarzi 23,2 mlrd. dollarni yoki YaIMga nisbatan 40,1 foizni tashkil etdi va yil boshiga nisbatan 133,7 mln. dollarga yoki yalpi ichki mahsulotga nisbati 0,3 foizga kamaydi. Bu raqamlar O‘zbekiston Moliya vazirligi “O‘zbekiston Respublikasi davlat qarzi holati va dinamikasi sharhi”da keltirilgan.
“davlat tashqi qarzi 21,0 mlrd. dollarni yoki YaIMga nisbatan 36,3 foizni tashkil etdi va yil boshiga nisbatan 73,6 mln.dollarga yoki yalpi ichki mahsulotga nisbati 0,2 foizga kamaydi;
davlat ichki qarzi 2,2 mlrd.dollarni yoki YaIMga nisbatan 3,8 foizni tashkil etdi va yil boshiga nisbatan 60,1 mln.dollarga yoki yalpi ichki mahsulotga nisbati 0,1 foizga kamaydi”, - deyilgan hisobotda.
Davlat qarzining kamayishi asosiy qarz to‘lovlarining amalga oshirilishi hamda davlat qarz portfeli tarkibidagi valyuta kurslaridagi o‘zgarishlar bilan izohlanadi. Masalan, yanvar-mart oylarida Yaponiya iyenasi AQSh dollariga nisbatan 6,1 foizga qadrsizlangan. O‘zbekiston davlat tashqi qarzlari portfelida esa Yaponiya milliy valyutasining ulushi 11 foizni tashkil etadi.