TOShKENT, 15-may – Sputnik. Tojikiston hukumati delegatsiyasining O‘zbekistonga tashrifi doirasida investitsiyalar va tashqi savdo vaziri S.Umurzakov Tojikiston iqtisodiy rivojlanish va savdo vaziri Zavqizoda Zavqi Aminni qabul qildi.
Uchrashuvda ikki davlat vakillari o‘zaro savdoning barqaror o‘sib kelayotganini ta’kidlashdi va o‘tgan 4-yil mobaynida bu ko‘rsatkich 4 barobardan ziyod oshgani qayd etildi.
Shu bilan birga mavjud texnik to‘siqlarni bartaraf etish, savdo tartiblarini soddalashtirish va o‘zbek va tojik ishlab chiqaruvchilari uchun yanada qulay shart-sharoitlar yaratish hamda yaqin yillarda o‘zaro savdo hajmini 1 mlrd dollarga yetkazish bo‘yicha amaliy hamkorlik to‘g‘risida kelishuvga erishildi.
Muloqot chog‘ida Toshkent shahrida O‘zbekiston Respublikasi va Tojikiston Respublikasi o‘rtasidagi savdo-iqtisodiy hamkorlik bo‘yicha Hukumatlararo komissiyasining 8-yig‘ilishini o‘tkazishga tayyorgarlik ko‘rish masalalari ham muhokama qilindi.
Undan tashqari tomonlar O‘zbekiston Respublikasi prezidentining iyun oyida Tojikistonga bo‘ladigan tashrifining kun tartibini tayyorlash bo‘yicha ishlarni davom ettirish va faollashtirishga kelishib oldilar.
Muzokaralar yakunida belgilangan vazifalar ijrosini jadallashtirish va qo‘shma tashabbuslarni ilgari surish maqsadida ikki mamlakatning tegishli vazirlik va idoralari o‘rtasida ikki tomonlama aloqalarni faollashtirishga kelishildi.