TOShKENT, 12-may - Sputnik. Toshkent viloyati Chirchiq shahar hokimligi ijtimoiy tarmoqlarda tarqalgan video - hokimlik binosi yaqinida ishchilar namoyishi yuz berganligi hodisasiga rasmiy munosabat bildirdi.
Ma’lum bo‘lishicha, ishchilar o‘z ish haqlari to‘lanmagani uchun hokimlik binosi oldida norozilik bildirganlar.
Ushbu fuqarolar qurilish tashkilotlari tomonidan ishga jalb qilingan bo‘lib, haqiqatan ham ularga haq to‘lash borasida kechikish yuzaga kelgan. Ular esa muammoni bartaraf etish maqsadida hokimlik mutasaddilariga murojaat qilish uchun to‘plangan.
"Ayni paytda barcha ishchilarga ish haqlarining ma’lum qismi to‘lab berilgan. Qolgan qismini esa 18-mayga qadar to‘liq hisob-kitob qilishga o‘zaro kelishilgan. Ayni paytda hokimlik tomonidan muammoni hal qilish choralari ko‘rilmoqda", — deyiladi xabarda.