TOShKENT, 10-may — Sputnik. AQSh Afg‘onistondagi harbiylarini Markaziy Osiyo davlatiga joylashtirishi mumkin. Bu haqda The Wall Street Journal gazetasi mudofaa idorasidagi manbalariga tayangan holda xabar qildi.
AQSh ba’zi harbiy amardorlarning fikricha, qo‘shinlarni Afg‘oniston bilan qo‘shni bo‘lgan O‘zbekiston va Tojikistonga joylashtirish eng yaxshi variant hisoblanadi.
Chunki bu amerikaliklarga zarurat holatida Afg‘onistondagi vaziyatga tezkorlik bilan javob berish imkonini beradi.
Biroq, Qo‘shma Shtatlarning rejalariga Rossiya va Xitoy "to‘sqinlik qilmoqda".
Shu bilan birga, Rossiyaning Markaziy Osiyoda jiddiy harbiy kuchlarga egaligi hamda Xitoyning ushbu mintaqaga ta’siri tobora oshayotgani Vashingtonning mintaqada bazalar tashkil etish rejalarini qiyinlashtirishi mumkin.
Ta’kidlanishicha, bu masala bo‘yicha hali rasmiy so‘rovlar berilmagan. Variant ko‘rib chiqilmoqda. Shu bilan bir qatorda, gazeta yozishicha, Oq uy Afg‘onistondan qo‘shinlarni Fors ko‘rfazi davlatlariga yoki HDFning alohida kemalariga o‘tkazish masalasini ko‘rib chiqmoqda.
Eslatib o‘tamiz, 14-aprel kuni AQSh prezidenti Jo Bayden amerika qo‘shinlarini Afg‘onistondan may oyida olib chiqishni boshlashni va uni 2021 yil 11-sentabriga kelib yakunlashni rejalashtirayotganini e’lon qildi.