TOShKENT, 11 apr — Sputnik. Qirg‘izistonda konstitutsiyaning yangi tahriri bo‘yicha referendum va mahalliy hokimiyat organlariga saylovlar boshlandi.
Sputnik Qirg‘iziston nashriga xabariga ko‘ra, mamlakat bo‘ylab saylov uchastkalari soat 20:00 ga qadar ochiq bo‘ladi. Referendum ishtirokchilari ro‘yxatida 3,6 million kishi qayd etilgan.
Mahalliy hokimiyat organlariga saylovlarda 420ta shahar va qishloq kengashlaridagi 7560 o‘ringa 18772 nomzod da’vogarlik qilmoqda.
Konstitutsiyaning yangi tahriri bilan mamlakatda boshqaruvning prezident shaklini tasdiqlash, Xalq qurultoyi (Xalq majlisi) instituti kiritish taklif qilinmoqda.
Shuningdek, prezident va hukumat institutlarini qayta shakllantirish rejalashtirilmoqda. Vazirlar mahkamasini shakllantirish va ishiga prezident mas’ul bo‘ladi, Vazirlar mahkamasiga esa prezident ma’muriyati boshlig‘i rahbarlik qiladi. Hujjat bilan parlament deputatlarining sonini 120 nafardan 90 nafargacha qisqartirish taklif qilinmoqda.
Aslida, taklif qilinayotgan yangiliklar parlament-prezident boshqaruvidan prezident boshqaruvi shakliga qaytishni anglatadi - 10-yanvardagi referendumda uni yoqlab mamlakat fuqarolarining 80 foizi ovoz bergandi. Referendumda saylovchilarning 30 foizdan ko‘prog‘i ishtirok etsa, bo‘lib o‘tgan deb tan olinadi.