TOShKENT, 20 mar – Sputnik. 2021-yilning 18-mart kuni Kobul shahrida O‘zbekiston prezidentining Afg‘oniston bo‘yicha maxsus vakili Ismatulla Irgashev Afg‘oniston Islom Respublikasi Tashqi ishlar vaziri Hanif Atmar bilan uchrashdi.
Afg‘oniston Tashqi ishlar vaziri afg‘on mojorasini siyosiy jihatdan bartaraf etish, mamlakatdagi infratuzilma va iqtisodiy loyihalarni amalga oshirish, xususan, “Surxon – Puli-Xumri” elektr uzatish liniyasi hamda “Mozori-Sharif – Kobul – Peshovar” temir yo‘li qurilishidagi O‘zbekistonning muhim rolini alohida ta’kidladi.
Afg‘oniston rahbariyati mamlakat iqtisodiyotini qayta tiklash hamda mintaqaviy bog‘liqlikni yanada rivojlantirishga ko‘maklashuvchi ushbu loyihalarga alohida e’tibor qaratayotgani qayd etildi.
Muloqot davomida o‘zbek-afg‘on hamkorligining boshqa sohalardagi ustuvor yo‘nalishlari bo‘yicha ham fikr almashildi.