TOShKENT, 26 yanv — Sputnik. Toshkent viloyati Angren shahar obodonlashtirish boshqarmasi sobiq rahbarining talon-torojliklari fosh etildi. Bu haqda Bosh prokuratura matbuot xizmati Sputnik nashriga ma’lum qildi.
Bosh prokuratura huzuridagi Departamentning Angren shahar bo‘limi tergovga qadar tekshiruv o‘tkazgan. Unda Angren shahar obodonlashtirish boshqarmasi sobiq rahbari A.I., “A.S.” MChJ rahbari X.I., “J.T.” MChJ rahbari J.A. va boshqalar obodonlashtirish uchun budjetdan ajratilgan 638,3 mln so‘mni talon-toroj qilganliklari aniqlangan. Ular 2019-yilda shaharda amalga oshirilgan obodonlashtirish ishlarida smetada nazarda tutilgan ishlarni to‘liq bajarmagan.
Mazkur holat yuzasidan A.I. va boshqalarga nisbatan Jinoyat kodeksining 167-moddasi 3-qismi (O‘zlashtirish yoki rastrata yo‘li bilan talon-toroj qilish) va 207-moddasi (Mansabga sovuqqonlik bilan qarash) bilan jinoyat ishi qo‘zg‘atilgan.
Tergov harakatlari o‘tkazilmoqda.