TOShKENT, 25 yanv - Sputnik. O‘zbekiston Oliy Majlisi Qonunchilik palatasida joriy yilda bo‘lib o‘tishi rejalashtirilgan prezident saylovlari sanasini o‘zgartirish masalasi muhokama qilindi. Bu haqida "Yuksalish" partiyasi matbuot xizmati xabar qilmoqda.
"O‘zbekistonda Prezident saylovlari oktabr oyi uchinchi o‘n kunligining birinchi yakshanbasida o‘tkazilishi mumkin. Ushbu masala Quyi palatadagi siyosiy partiyalar fraksiyalari yig‘ilishida muhokama qilindi", - deyilgan xabarda.
Saylov sanasini o‘zgartirish borasida hech qanday xulosaga kelinmagan va Oliy Majlisning navbatdagi sessiyasida muhokama qilish uchun qoldirilgan.
Eslatib o‘tamiz, O‘zbekiston Respublikasi Konstitutsiyasining 117-moddasiga muvofiq "Prezident saylovi <...> konstitutsiyaviy vakolat muddati tugaydigan yilda — dekabr oyi uchinchi o‘n kunligining birinchi yakshanbasida o‘tkaziladi".