TOShKENT, 21 dek — Sputnik. Belarus xorijiy davlatlardan birinchi bo‘lib koronavirusga qarshi Rossiyaning “Sputnik V” vaksinasini ro‘yxatga oldi. Bu haqda Rossiya to‘g‘ridan-to‘g‘ri investitsiyalar jamg‘armasi (RFPI) xabar qildi.
“RFPI Belarus Respublikasi Sog‘liqni saqlash vazirligi tomonidan koronavirusga qarshi Rossiyaning “Sputnik V” vaksinasiga ro‘yxatga olinganlik guvohnomasi berilganini ma’lum qiladi. Shunday qilib, Belarus o‘z hududida vaksinani rasman ro‘yxatga olgan birinchi xorijiy davlat bo‘ldi”, - deyilgan xabarda.
Ta’kidlanishicha, hozir mamlakatda vaksinani ishlab chiqarishni yo‘lga qo‘yish borasida ish olib borilmoqda.
Belarusga “Sputnik V” vaksinasining birinchi partiyasi sentabr oxirida yetkazib berilgan edi. Ko‘ngillilarni emlash 1-oktabrdan boshlangan.