TOShKENT, 25 sen - Sputnik. Prezident Shavkat Mirziyoyev huzurida 24-sentabr kuni bo‘lib o‘tgan yig‘ilishda Respublika tuman va shaharlaridagi tadbirkorlik muhiti muhokama qilindi.
Xususan, O‘zbekistonda ilk bor tuman va shaharlardagi iqtisodiy ko‘rsatkichlar, tadbirkorlikni qo‘llab-quvvatlash muhiti, infratuzilma va mavjud resurslardan foydalanish darajasi o‘rganildi. Tahlillar asosida har bir tumanga tadbirkorlik rivoji holati “yaxshi”, “o‘rta” va “qoniqarsiz” deb bho berildi. Yakuniy hisobotga ko‘ra, 48 ta tumanda va shaharda tadbirkorlik holati “yaxshi”, 119 tasida - “o‘rta” hamda 33 tasida - “qoniqarsiz”, deb baholandi.
Tadbirkorlik ko‘rsatkichlari bo‘yicha eng salbiy natija Nukus, Baliqchi, Bekobod, Xovos, Baxmal, Mirzacho‘l, Yangiqo‘rg‘on, Shovot, Kasbi, Qumqo‘rg‘on, Uchtepa kabi tumanlarda aniqlangan.
Prezident ushbu tumanlar rahbarlarini keskin tanqid qilib, kelajakda tuman hokimlarini xalq saylashi tartibi joriy etilishini aytib o‘tdi.
"Odamlarimiz turmushini yaxshilashga harakat qilmagan rahbar bir kun ham ishlamaydi <...> Hokimlarni xalq saylashi kerak. Shu kunlarga baribir kelamiz, – deya ta’kidladi Prezident.
“Qoniqarsiz” hamda “o‘rta” deb baholangan tuman va shaharlarda inqirozga qarshi boshqaruv tizimi joriy etilishi belgilandi. Ya’ni, ularga rahbarlik qilish istagini bildirgan har qanday talabgor hududni rivojlantirish dasturini mahalliy kengashlarda himoya qilishi mumkin. Xalq vakillarini ishontira olgan salohiyatli kishilar butun jamoasi bilan tumanga rahbar etib tayinlanadi.
Ushbu tumanlarda muhandislik kommunikatsiyalarini yaxshilab, kichik sanoat zonasi tashkil etish, yaylovlarda chorvachilik, qorako‘lchilik, yilqichilikni rivojlantirish, chegaraoldi savdo va xizmatlarni kengaytirish bo‘yicha topshiriqlar berildi.
Yaxshi ko‘rsatkichlarga erishgan tuman va shahar hokimlari hamda ularning o‘rinbosarlari maoshiga 30 % ustama tayinlanib, ahvol qoniqarsiz bo‘lgan hududlar rahbarlariga jarima qo‘llanishi aytib o‘tildi.