TOShKENT, 6 sen — Sputnik. Toshkent viloyati Qibray tumanida dala hovlisida ko‘p miqdorda kannabis o‘simligi yetishtirib, uyida marixuana saqlab kelayotgan shaxs qo‘lga olindi. Bu haqda viloyat IIBB matbuot xizmati xabar qildi.
Ushbu tadbir IIBB JQB Uyushgan jinoyatchilikka va qurol bilan qonunga xilof ravishda muomala qilishga qarshi kurashish bo‘linmasi xodimlari tomonidan o‘tkazilgan.
Ta’kidlanishicha, 2011-yilda taqiqlangan ekinlar, ya’ni, giyohvandlik moddalari yetishtirish va o‘tkazish bilan shug‘ullangani uchun 11-yilga ozodlikdan mahrum qilinib, bugungi kunda ozodlikda bo‘lgan 70 yoshli nafaqaxo‘r B.D. dala hovlisidagi issiqxonasida jami 26 tup kannabis (tarkibida giyohvand moddasi bo‘lgan) o‘simligini parvarish qilib kelayotganligi aniqlangan.
Shuningdek, uning xonadonida 6 kg marixuana giyohvandlik moddasi saqlanayotganligi aniqlanib, daliliy ashyo sifatida olingan.
Mazkur holat yuzasidan ushlangan shaxsga nisbatan Jinoyat kodeksining 270-moddasi hamda 276-moddasi 2-qismi bilan jinoyat ishi qo‘zg‘atilgan.
Tergov harakatlari olib borilmoqda.