TOShKENT, 29-iyul - Sputnik. Rossiya va O‘zbekiston o‘rtasidagi savdo-iqtisodiy hamkorlik salohiyatiga bag‘ishlangan vebinar davomida Rossiya va O‘zbekiston vakillari O‘zbekistonda (Toshkent shahrida) Rossiya savdo uyini va Rossiyada (Samara shahrida) O‘zbekiston savdo uyini ochish bo‘ycha loyihalarning borishi yuzasidan fikr almashdilar.
Bu haqda O‘zbekiston TIV matbuot-xizmati xabar bermoqda.
O‘zbekistonning Rossiyadagi elchixonasi, Rossiyaning O‘zbekistondagi elchixonasi, O‘zbekiston eksportchilari uyushmasi, "Rossiyskiy eksportniy sentr" va "Azia-Invest Bank" Aksiyadorlik jamiyatlari rahbariyati va vakillari ishtirok etgan tadbirda O‘zbekiston va Rossiya o‘rtasidagi savdo-iqtisodiy aloqalarining zamonaviy holati va ularni yanada kengaytirish uchun yangi imkoniyatlar muhokama qilingan.
Mamlakatlar o‘rtasida eksport yoki import faoliyati bilan shug‘ullanuvchi kompaniyalarini qo‘llab-quvvatlash uchun zarur moliyaviy vositalarni ishlab chiqish zarurligi qayt etilgan.
O‘zbekiston bozorida faoliyat yuritayotgan Rossiya kompaniyalarining tajribasi va muvaffaqiyatlari atroflicha tahlil etilib, bu boradagi mavjud muammolar ko‘rsatib o‘tilgan va ularni hal etish yo‘llari taklif etilgan.
Ta’kidlanishicha, mazkur tadbir O‘zbekistonning Rossiyadagi elchixonasi tomonidan davlat rahbari belgilab bergan Rossiya bilan ikki tomonlama savdo-iqtisodiy aloqalarni kengaytirish, mahalliy tadbirkorlarga Rossiya bozoriga kirishda ko‘maklashish, Rossiya sarmoyasi va texnologiyalarini O‘zbekiston iqtisodiyotiga jalb etish bo‘yicha ko‘rsatmalarini amalga oshirishga qaratilgan ishlarning mantiqiy davomi bo‘lgan.