TOShKENT, 29-iyul - Sputnik. O‘zbekiston DXX tomonidan o‘tkazilgan tezkor tadbirlar davomida jami 10 kilogrammdan ziyod opiy va 22,5 kiloga yaqin gashish giyohvand moddalari musodara qilindi , deb xabar bermoqda Sputnik O‘zbekiston muxbiri.
Xususan, "Veteran" jangchi-faxriy va nogironlar birlashmasining Andijon viloyati Xo‘jaobod tuman bo‘limi raisi va yana bir shaxs mazkur tumanning Manak qishlog‘ining Qirg‘izistonning O‘sh shahri Suratosh qishlog‘i bilan chegaradosh hududidagi chegara simto‘siqlari orqali qirg‘izistonlik shaxsdan 971 gr. gashish giyohvand moddasini qabul qilib olib, chegaraoldi hududda harakatlanayotgan vaqtlarida DXX ChQ harbiy xizmatchilari tomonidan qo‘lga olindi.
Shuningdek, DXX Chegara qo‘shinlari harbiy xizmatchilari tomonidan Toshkent viloyati Bekobod tumanida o‘tkazilgan tezkor qidiruv tadbiri davomida 1988 y.t. Sh.A. 10 kg 130 gr. opiy va 19 kg 74 gr. gashish moddasi bilan qo‘lga tushgan.
Aniqlanishicha, mazkur giyohvandlik moddasini unga tojikistonlik tanishi O‘zbekiston - Tojikiston o‘rtasidagi chegara sim to‘siqlari ostidan o‘tkazib bergan.
Muqaddam sudlangan Sh.A. og‘uni Toshkent shahrida sotishni rejalashtirgan.
DXX Andijon viloyati boshqarmasi xodimlari tomonidan o‘tkazilgan tezkor tadbir davomida Bo‘ston tumani hududidagi YPX maskanida "Andijon-Toshkent" yo‘nalishida harakatlanib ketayotgan "Cobalt" rusumli avtomashina to‘xtatilib tekshirilgan. atijada, mashina yo‘lovchisi - 1983-yilda Paxtaobod tumanida tug‘ilgan S.Yu.ga tegishli bo‘lgan sellofan paket ichidan 1 kg 446 gr. gashish moddasi topilgan.
S.Yu. giyohvand moddani Qirg‘izistonning Qora-suu shahrida yashovchi shaxsdan olib, aylanma yo‘llar orqali Andijon viloyati hududiga olib o‘tgan va sotish maqsadida Toshkent shahriga ketayotgan bo‘lgan.
Mazkur holatlar yuzasidan Jinoyat Kodeksining tegishli moddalariga asosan jinoyat ishlari qo‘zg‘atilib, tergov harakatlari olib borilmoqda.