TOShKENT, 19-iyul — Sputnik. Qoraqalpog‘iston Respublikasi Jo‘qorg‘i Kengesi raisi Musa Yerniyazov va Surxondaryo viloyati hokimi To‘ra Bobolov koronavirus bilan kasallandi.
Sog‘liqni saqlash vazirligi xabariga ko‘ra, Musa Yerniyazov Nukusda va Surxondaryo viloyati hokimi To‘ra Bobolov Toshkent shahrida davolanmoqda.
Bugungi kunda ularning ahvoli qoniqarli deb topilgan. Ta’kidlanishicha, davolash taktikasi Jahon sog‘liqni saqlash tashkiloti tomonidan ishlab chiqilgan standartlar asosida olib borilmoqda.
Kuni kecha sog‘liqni saqlash vaziri Alisher Shodmonov boshchiligidagi bir guruh soha vakillari Qoraqalpog‘iston Respublikasiga tashrif buyurgan. U yerdagi mavjud holat o‘rganilib, olib borilayotgan profilaktika, epidemiologiya tadbirlarining sifati tanqidiy ko‘rib chiqilgan.
Eslatib o‘tamiz, O‘zbekistonda tasdiqlangan koronavirus holati 16429 taga yetgan. Bemorlarning 9127 nafari tuzalib ketgan. 84 kishini virus bevaqt hayotdan olib ketgan.