TOShKENT, 19-iyul — Sputnik. “Paxtakor” futbol klubi o‘yinchilarida koronavirus aniqlangani bo‘yicha ma’lumot berildi.
Klubning telegramdagi kanalida bildirilishicha, asosiy jamoaning 5 nafar futbolchisining koronavirusga topshirilgan test natijalari musbat chiqqan.
Ta’kidlanishicha, “Paxtakor” futbol klubida doimiy ravishda futbolchilar va klub xodimlari COVID-19 ga muntazam tarzda test topshirib kelishadi.
OKMK bilan o‘tkazilgan Superliga 9-tur bahsidan keyin ba’zi futbolchilar sog‘lig‘ida muammolar paydo bo‘lgan. Shundan keyin mashg‘ulotlar vaqtincha to‘xtatib turilgan.
Ayni paytda koronavirus aniqlangan 5 nafar futbolchi yakkalangan va davolanishmoqda.
Avvalroq ijtimoiy tarmoqlarda “Paxtakor” futbol klubining bir necha o‘yinchisida koronavirus aniqlangani haqidagi xabar tarqalgan edi.