TOShKENT, 17-iyul - Sputnik. Amur gazni qayta ishlash zavodi qurilishidagi muammo o‘z yechimini topdi, deb xabar qilmoqda O‘zbekistonning Moskvadagi elchixonasi.
"Rossiya va Turkiya tomoni bilan hamkorlikda amalga oshirilgan chora-tadbirlar natijasi o‘laroq mummoning barcha uchun maqbul yechimi topildi va vaqtinchalik shaharchada tartib-intizom tiklandi", - deyilgan xabarda.
Ayni damda O‘zbekiston fuqarolari ish tashlashni to‘xtatib, obyektda mehnat faoliyatini qayta boshlashgan. Rossiya huquqni saqlash organlari bo‘lib o‘tgan mojaro yuzasidan tekshiruvlar olib bormoqda.
Tekshiruvlarda ish beruvchi tomonidan mehnat qonunchiligining buzilishi, ishchilar tomonidan tartibsizliklar uyushtirilishi va boshqa qonun buzish holatlari o‘rganib chiqiladi va qonunbuzarlar javobgarlikka tortiladi.
O‘z navbatida, O‘zbekistonning Rossiyadagi elchixonasi mazkur jarayonda O‘zbekiston fuqarolarining qonuniy huquq va manfaatlari buzilmasligi uchun barcha zaruriy chora-tadbirlarni amalga oshiradi, - deyilgan xabarda.
Eslatib o‘tamiz, 13-iyul kuni Amur GQIZida 300ga yaqin ishchilar maoshdan norozi bo‘lib korxona hududida tartibsizliklar uyushtirishgan edi.
Mojaroni tafsilotlarini aniqlash va uni hal qilishda ishtirok etish, O‘zbekiston Respublikasi fuqarolarining qonuniy huquq va manfaatlari himoyasini ta’minlash maqsadida voqea joyiga Elchixona Bosh konsuli M.Xayriddinov yetib borgan edi. Bosh konsul viloyat ma’muriyati, prokuratura va ish beruvchi hamda vatandoshlar bilan uchrashuvlar o‘tkazib, ishchilar noroziligiga sabab bo‘lgan omillarni aniqladi.