TOShKENT, 30-iyun - Sputnik. Qoraqalpog‘istonda fuqarolarni o‘qishga kiritib qo‘ymoqchi bo‘lgan dekan o‘rinbosari ushlandi, deb xabar qilmoqda Bosh prokuratura axborot xizmati.
"Bosh prokuratura huzuridagi Departamentning Kegeyli tuman bo‘limi tomonidan prokuratura, DXX va IIB xodimlari bilan hamkorlikda o‘tkazilgan tezkor tadbirda Nukus davlat pedagogika institutining o‘quv ishlari bo‘yicha dekan o‘rinbosari D.S qo‘lga olingan", - deyiladi xabarda.
Ta’kidlanishicha, dekan o‘rinbosari fuqaro T.ni tanishlari orqali mazkur institutga o‘qishga kiritib qo‘yish uchun 3 ming AQSh dollarini olayotgan vaqtda ashyoviy dalil bilan ushlangan.
Departamentning Buxoro viloyat boshqarmasi tomonidan o‘tkazilgan tezkor tadbirda ham Buxoro muhandaslik texnologiya instituti dekan o‘rinbosari M.A. va Toshkent Davlat irrigatsiya va qishloq xo‘jaligi mexanizatsiya instituti Buxoro viloyat filiali talabasi M.Q. bilan oldindan til biriktirib, fuqaro O.ni Moskva Davlat Radio elektronika va radio texnika institutiga o‘qishga kirishi uchun onlayn tarzda bo‘ladigan test sinovlaridan o‘tkazib berish evaziga 2 500 AQSh dollari talab qilib, shundan, 1 500 AQSh dollarini olgan vaqtida ashyoviy dalil bilan ushlanganlar.
Yuqoridagi holatlar yuzasidan Jinoyat kodeksining 168 va 28, 211-moddasi bilan jinoyat ishlari qo‘zg‘atilib, tergov harakatlari o‘tkazilmoqda.