TOShKENT, 10-iyun — Sputnik. Kelib chiqishi o‘zbek bo‘lgan general, Abdul-Rashid Do‘stumga marshal unvonini berishiga shubha yo‘q edi, bu haqda Sputnik Tojikiston’ga Do‘stumning matbuot kotibi Bashir Ahmad ma’lum qildi.
"Bu allaqachon imzolangan shartnomaning shartidir. Hozir marosimni kutmoqdamiz, u Afg‘onistondagi prezident saroyida bo‘ladi, general unvonni olish uchun Shibargandan Kobulga keladi", - dedi Bashir Ahmad.
Shu kunlarda afg‘on OAVlari G‘ani va Abdulloh o‘rtasida general Do‘stumga marshal unvonini berish masalasida tortishuv yuzaga kelgani haqida xabar qilishdi.
Ta’kidlanishicha, prezident G‘ani Do‘stumga "Faxriy marshal" unvonini berish to‘g‘risida buyruq chiqarmoqchi edi, ammo Abdulloh "faxriy" so‘zining kiritilishiga qarshi chiqdi.
Imzolanish marosimida qatnashgan Abdulloh jamoasi a’zosi, "Osiyoning yuragi" tashkiloti rahbari Muhibullo Nuri Sputnik Tojikiston’ga kelishmovchilik borligini tasdiqladi. Uning so‘zlariga ko‘ra, prezident bunday matn bilan farmonga imzo chekmoqchi bo‘lganida, Abdullohning e’tiroziga sabab bo‘ldi.
"Faxriy marshal marshalning maoshi, imtiyozlari va vakolatlaridan foydalana olmaydi. Ammo kelishuvga binoan general Do‘stum afg‘on qurolli kuchlarining haqiqiy va amaldagi marshali bo‘ladi. Doktor Abdulloh bu haqda G‘ani bilan gaplashdi va qisqa munozaradan so‘ng general Do‘stumga marshal unvonini berish to‘g‘risida farmon imzolandi". - dedi Muhibullo Nuri.
17 may kuni Prezident Ashraf G‘ani va Afg‘oniston Oliy Milliy Kengashi rahbari Abdulloh Abdulloh tomonidan imzolangan Siyosiy Bitimning yettinchi xatboshiga binoan Abdul-Rashid Do‘stumga Marshal harbiy unvoni berildi. Kelishuvga binoan, Do‘stum prezidentning buyrug‘iga binoan Afg‘onistonning Oliy davlat kengashi va milliy xavfsizlik kengashi a’zosi etib tayinlandi.
O‘tgan yil sentabr oyida Afg‘onistonda bo‘lib o‘tgan prezident saylovlaridan keyin siyosiy bitim imzolandi. Ushbu saylovlarda Afg‘onistondagi o‘zbek diasporasi rahbari Abdul Rashid Do‘stum Abdulloh Abdullohni qo‘llab-quvvatladi.