TOShKENT, 20-may - Sputnik. Toshkentda IIB va Milliy Gvardiya xodimlari 52 nafar himoyaga muhtoj ayollarga qo‘riqlash orderlari topshirdi, deb xabar qilmoqda IIBB matbuot xizmati.
"O‘tgan 17 va 18-may kunlari xotin-qizlar masalalari bo‘yicha inspektorlar Milliy gvardiyaning ayol-xizmatchilari bilan birgalikda 223 tadan ortiq oilalarda bo‘lib, 48 ta har tomonlama yordamga muhtoj oilalarni aniqladilar va 52 nafar ayollarga qo‘riqlash orderlarini topshirishdi, - deyilgan xabarda.
IIBB va Milliy Gvardiyaning ayol xizmatchilaridan tashkil topgan maxsus qo‘shma guruhlarning asosiy vazifasi – muammolarni aniqlash va ularni hal etishda yordam berish, jabrlangan ayollarni huquqini himoya qilish bo‘yicha barcha choralarni qo‘llash, zarur hollarda – qo‘riqlash orderini topshirishdir.
Qo‘shma guruhlar xavotirli xabarlar kelib tushgan oilalardan xabar olishdi, joylarda suhbatlar o‘tkazib, xonadaonlardagi vaziyat o‘rganildi, muammolar aniqlandi. Biror oilada ayol kishi psixologik va ruhim bosimga, yoki jismoniy zo‘ravonlikka uchragani ma’lum bo‘lsa, bu kabi oilalar bilan ishlar ehtiyotkorlik bilan olib boriladi. Chunki bunday holatlarda odob bilan ishlash, shuningdek, jabrlanuvchining hatti-harakatlariga baho bermaslik, hukm chiqarishga shoshmaslik, ularga diqqat bilan quloq solish va ayollarni haqoratlaydigan, kamsitadiganlarga nisbatan keskin bo‘lish talab etiladi.
Ma’lumot uchun, koronavirus epidemiyasi tufayli o‘rtacha hisobda 2,6 milliard kishi bir necha oydan beri o‘z-o‘zini yakkalash tartibida turmush kechirmoqda. Ushbu vaziyatdan oilaviy zo‘ravonlik holatlari kesikn ko‘payishi kuzatilmoqda. Ayrim mamlakatlarda oilaviy zo‘ravonlikdan jabrlanganlar soni 2 baravar oshgani haiqda BMT bosh kotibi Antonio Guterrish 5-aprel kuni so‘zlagan nutqida aytib o‘tgandi.