TOShKENT, 15 apr - Sputnik. Madaniyat vazirligi matbuot-xizmati rahbari Mavluda Asqarxo‘jayeva OAVlarda paydo bo‘lgan Registon maydonining orqa qismida 2006-yilda qurilgan devorning buzilishi haqidagi mish-mishlarga izoh berdi, deb xabar qilmoqda Sputnik O‘zbekiston muxbiri.
Ushbu devor tarixiy maydonni eski shahar qismidan ajratish uchun qurilgan bo‘lgan.
Madaniyat vazirligi vakili so‘zlariga ko‘ra, Samarqand shahar hokimligidan devorning buzilishi yoki rekonstruksiyasi haqida idoraga shu paytga qadar hech qanday talabnoma kelib tushmagan.
Qolaversa, shaharning tarixiy qismi, tarixiy yodgorliklar mavjud hududlardan 300 metrgacha bo‘lgan masofa "bufer hudud" hisoblanib, Madaniyat vazirligi himoyasida bo‘ladi va O‘zbekiston madaniy merosining bir qismi hisoblanadi.
Shu bois, bu kabi qarorlar faqatgina Madaniyat vazirligi bilan kelishilgan holda qabul qilinadi.
Eslatib o‘tamiz, o‘tgan yakshanba kuni Turizmni rivojlantirish davlat qo‘mitasi raisi Aziz Abduhakimov ayni damda qo‘mita va uning huzuridagi Milliy PR markazi O‘zbekistonda turizm bo‘yicha virtual sayohatlarni amalga oshirish imkonini beruvchi online-tourism.uz saytini yo‘lga qo‘yish ustida ishlayotganini ma’lum qilgan edi.
Abduhakimovga ko‘ra, bu O‘zbekiston bo‘ylab virtual sayohat qilish imkonini taqdim etuvchi birinchi platforma bo‘ladi.