TOShKENT, 2 apr — Sputnik. Moskvada yashashga imkoni bo‘lmagan 160 ga yaqin o‘zbekistonliklar navbatdagi charter reyslari tashkil etilgunga qadar hostel (yotoqxona)ga joylashtirilgan.
“Dunyo” AA xabariga ko‘ra, ularga yashash uchun barcha sharoit yaratilgan. Xususan, kuniga uch mahal issiq ovqat tashkil etilgan, ular bilan doimiy aloqa o‘rnatilgan.
O‘zbekistonning Moskvadagi elchixonasi Domodedovo va Jukovskiy aeroportlarida O‘zbekiston fuqarolarining to‘planishi faktini rad etgan. Diplomatik vakolatxonaga ko‘ra, Vnukovo va Sheremetyevo aeroportlarida bo‘lgan vatandoshlarning aksariyati charter reyslarida O‘zbekistonga olib ketilgan.
Eslatib o‘tamiz, avvalroq Domodedovo aeroportidan charter reyslarida uylariga qaytishni istagan 300 ga yaqin Markaziy Osiyodan bo‘lgan migrantlar chiqarib yuborilgani xabar qilingan edi.