TOShKENT, 27 mar - Sputnik. Markaziy harbiy okrug bo‘linmasi Qozog‘istondan kelgan 1157 nafar o‘zbekistonliklarni xavfsizligini ta’minlashga jalb qilindi.
Xabarda aytilishicha, 25-mart kuni 1157 nafar O‘zbekiston fuqarosi temiryo‘l orqali Qozog‘iston Respublikasidan Samarqand shahriga olib kelingan. Shundan so‘ng ular Markaziy harbiy okrug qo‘mondonligi, viloyat hokimligi, Sog‘liqni saqlash boshqarmasi hamda soha mutaxassislari tomonidan qisqa fursatda Samarqand shahrida vaqtincha tashkil etilgan karantin maskaniga joylashtirilgan.
"30 ga yaqin shifokorlar tomonidan sog‘lig‘i tekshirilgan yigit-qizlar, ayollar hamda bolalar o‘zlari uchun ajratilgan hamda dizenfeksiya qilingan shinam xonalarga joylashtirildi", - deyiladi xabarda.
Karantindagi fuqarolar xavfsizligini ta’minlash maqsadida Markaziy harbiy okrug harbiy xizmatchilari tomonidan patrullik qo‘riqlovi tashkil etilgan.
Eslatib o‘tamiz, 26-mart kuni O‘zbekiston TIV axborot xizmati rahbari Avazbek Hojimatov "23-martdan qo‘shni davlatlar bilan chegara o‘tkazish punktlari yopilishi munosabati bilan O‘zbekistonning Qozog‘iston va Qirg‘iziston bilan chegaralarida ko‘plab O‘zbekiston fuqarolari to‘planishi kuzatilgan. 25-mart soat 19:00 gacha Qozog‘istondan 1 450 nafar va Qirg‘izistondan 550 nafardan ortiq fuqarolar uyushgan holda chegaradan o‘tkazilgan"ini ma’lum qilgan edi.