TOShKENT, 26 mar — Sputnik. Karantin vaqtida yuqumli kasalliklar haqida yolg‘on va asoslanmagan ma’lumotlarni tarqatganlik uchun jinoiy javobgarlik belgilandi. Bu haqda “Huquqiy axborot” kanalida ma’lum qilindi.
Shavkat Mirziyoyev imzolangan O‘RQ–613 sonli qonuniga muvofiq, Jinoyat kodeksi 244-5-modda bilan to‘ldirildi.
Unga ko‘ra, karantin davrida inson uchun xavfli bo‘lgan boshqa yuqumli kasalliklar tarqalishi haqida haqiqatga to‘g‘ri kelmaydigan ma’lumotlarni tarqatish BHMning 200 baravarigacha (44 mln 600 ming so‘m) jarima jazosiga tortishga, 300 soatgacha majburiy jamoat ishlari va 2-yilgacha axloq tuzatish ishlari bilan jazolashga sabab bo‘ladi.
Mazkur ma’lumotlarni nashr qilish yoki boshqacha usulda ko‘paytirish yoki OAV, shuningdek Internet orqali tarqatish 44 mln 600 ming so‘mdan 89 mln 200 ming so‘mgacha miqdorda jarima tortilishiga sabab bo‘ladi.
Shuningdek, ushbu harakatlarni sodir etgan shaxs 300 soatdan 360 soatgacha majburiy jamoat ishlari, 2-yildan 3-yilgacha axloq tuzatish ishlari, 3-yilgacha ozodlikni cheklash va 3-yilgacha ozodlikdan mahrum qilish jazosi bilan jazolanadi.