TOShKENT, 23 mar — Sputnik. Uzbekistan AirwaysMoskvada O‘zbekistonga bo‘lgan charter qatnovini kutayotgan yo‘lovchilarga murojaat qilib, aeroportlarda paydo bo‘lgan firibgarlardan ogohlantirdi.
“Ular fuqarolarimizning ishonchiga kirib, charter qatnoviga chipta sotish bilan bog‘liq masalalarni messenjerlar orqali hal qila olishini va’da bermoqda. Yo‘lovchilardan pasport ma’lumotlarini va chipta narxining 70% to‘lovni oldindan amalga oshirishni talab qiladi”, - deyilgan xabarda.
Aniqlik kiritilishicha, hozirda ikki nafar O‘zbekiston fuqarosi ushbu firibgarlar tuzog‘iga ilingan.
Kompaniya Toshkentga bo‘lgan charter qatnoviga chipta sotib olishni va’da qilgan shubhali shaxslar bilan aloqa qilishda ehtiyot bo‘lishni so‘rab qolgan.
Charterlar jadvali uzairways.com saytida, shuningdek, ijtimoiy tarmoqlarda https://t.me/koronavirusinfouz va https://t.me/uzbekmid telegram-kanallarida o‘z vaqtida e’lon qilinishi qo‘yshimcha qilingan.
Eslatib o‘tamiz, avvalroq O‘zbekistonning Moskvadagi elchixonasi Vnukovo aeroportida qiyin vaziyatga tushib qolgan o‘zbekistonliklarga yordam bergani xabar qiligan edi. Vnukovo aeroporti rahbariyati tomonidan o‘zbekistonliklarning vaqtinchalik turishlari uchun “B” terminali ajratilgan. Ushbu qism tibbiy punkt, hojatxona, issiq ovqat va mebel jihozlari bilan ta’minlangan.