TOShKENT, 22 mar — Sputnik. Toshkent shahar hokimi yo‘nalishsiz taksida yo‘lovchi tashish bilan shug‘ullanuvchi xo‘jalik subyektlariga murojaat qildi.
Ta’kidlanishicha, ular avtomashinalarini poytaxtdagi 8 ta avtobus saroyida, Toshkent shahar Sanitariya va epidemiologik osoyishtalik markazi xodimlari tomonidan hech qanday to‘lovsiz dezinfeksiyadan o‘tkazishlari mumkin.
Yo‘lovchi tashishga Toshkent shahar SEOM nazoratidan o‘tmasdan va avtomashinasini dezinfeksiyadan o‘tkazmasdan chiqqan haydovchilarga qonunchilikka muvofiq choralar ko‘riladi.
“Shu bilan birga barcha taksi egalaridan yo‘l haqini oshirib yubormasdan, mo‘’tadil ushlab turish so‘raladi”, - deyiladi Jahongir Ortiqxo‘jayev murojaatida.
Eslatib o‘tamiz, avvalroq 22-martdan Toshkent shahrida faqat yengil avtomobillar, ya’ni dezinfeksiya qilingan yo‘nalishsiz taksilarda yo‘lovchi tashilishiga ruxsat berilishi xabar qilingan edi.