TOShKENT, 17 mar — Sputnik. Ijtimoiy tarmoqlarda hududning vertolotlarda dezinfeksiya qilinishi, jamoat joylarida aniqlangan bolalarning ota-onalari jarimaga tortilishi haqidagi yolg‘on xabarlar tarqatganlar jarimaga tortiladi, deb xabar qilmoqda koronavirus epidemiyasi haqida xabar beruvchi maxsus axborot xizmati.
Ma’lum bo‘lishicha, takror ogohlantirishlarga qaramay, ijtimoiy tarmoqlarda haqiqatga zid bo‘lgan 3 ta yolg‘on va asossiz ma’lumotlar tarqatilgan:
Biri «Bugun 23:00 va tonggi 5:00 gacha vertolotlar dezinfeksiya uchun dori sepishi, deraza va balkonlar yopiq bo‘lishi lozimligi, 23:00dan so‘ng ko‘chalarda yurish mumkin emasligi haqida harbiy qismdan xabar berilgan”i bo‘lsa, ikkinchisi «Do‘konlarda, avtobuslar va ko‘chalarda bolalar aniqlansa, ularning ota-onalari jarimaga tortilishi” bilan bog‘liq xabardir.
Shuningdek, «Xavfsizlikni ta’minlash maqsadida maktablarda reydlar o‘tkazilishi, qo‘shimcha darslar yoki to‘garaklarda ishtirok etayotgan o‘quvchilar aniqlanganda maktablarning jarimaga tortilishi” – haqidagi xabar ham asossiz bo‘lib chiqdi.
Ushbu haqiqatga zid bo‘lgan ma’lumotlarni tarqatgan shaxslar 66 mln 900 ming so‘mdan 89 mln 200 minggacha jarima yoki 3-yildan 5-yilgacha ozodlikni cheklash yoxud 3-yildan 5-yilgacha ozodlikdan mahrum qilish jazosiga tortilishlari bilan takror ogohlantirilmoqda.