TOShKENT, 12 fev – Sputnik. 25 yoshli O‘zbekiston fuqarosi Polejayevsk parkidan qaytayotganida 4 kishining hujumiga uchragan, ulardan biri noma’lum quroldan foydalanib, uning bosh qismiga otgan. Holat yuzasidan Tashqi mehnat migratsiyasi agentligi matbuot xizmati ma’lum qildi.
Qayd etilishicha, holat 7-fevral kuni kech soat 21:30 da sodir bo‘lgan. Do‘konda yordamchi ishchi sifatida ishlovchi 25 yoshli O‘zbekiston fuqarosi Sankt-Peterburgning Polejayevsk parkidan qaytayotganida uni to‘rt kishi to‘xtatib, ismini so‘ragan va ulardan biri noma’lum quroldan foydalanib, uning bosh qismiga otgan.
Yarador bo‘lgan O‘zbekiston fuqarosi u yerdan qochgan va uyiga yetib kelib, tez yordam chaqirgan.
Holat bo‘yicha Tashqi mehnat migratsiyasi agentligining Rossiyadagi vakolatxonasi hamda O‘zbekistonning Sankt-Peterburgdagi bosh konsulligi hamkorligida Rossiya huquqni muhofaza qiluvchi organlari bilan tezkor aloqa o‘rnatilgan.
1994 yilda tug‘ilgan O‘zbekiston fuqarosi S.N ga Sankt-Peterburg shahridagi 26-sonli kasalxona shifokorlari tomonidan zarur tibbiy yordam ko‘rsatilgan. Uning hayoti xavf ostida emasligi sababli 8-fevral kuni uyiga ruxsat berilgan.
Hozirda O‘zbekiston fuqarosiga hujum qilganlarning 3 nafari ushlangan va ularga nisbatan Rossiya Federatsiyasi JKning 111-moddasi 2-qismi bilan jinoyat ishi qo‘zg‘atilgan.
Ayni damda holat Tashqi mehnat migratsiyasi agentligi tomonidan nazoratga olinib, fuqaroga zarur huquqiy yordam ko‘rsatilmoqda.