TOShKENT, 22 yanv — Sputnik. Taniqli aktrisa, O‘zbekistonda xizmat ko‘rsatgan artist Aida Yunusova 72 yoshda olamdan ko‘z yumdi. U og‘ir xastalikni boshdan kechirgandi. Bu haqda “O‘zbekkino” matbuot xizmati xabar qildi. Agentlik marhumaning vafoti munosabati bilan uning yaqinlariga chuqur ta’ziya bildirgan.
Aktrisa uzoq vaqt davomida turli rollar ijro etgan. Jumladan, “Ajoyib xayolparast”, “Chinor ostidagi duel”, “Olovli yo‘llar”, “Oltin kuz”, “Mehrigiyo”, “Zulmatni tark etib”, “Karvon”, “Anor”, “Birinchi yo‘lovchilar” kartinalarida qatnashgan.
Aktrisa sifatida 1989-yilgacha “O‘zbekfilm”da faoliyat ko‘rsatgan. Shundan so‘ng kinoni tark etgan. Ma’lum tanaffusdan so‘ng yana kinoga qaytdi va ekranda ko‘rina boshlagandi. Aida Yunusova og‘ir xastalikni boshdan kechirgandi.
Aida Yunusova 1948-yilda Farg‘onaning Marg‘ilon shahrida tug‘ilgan. 1970-yili teatr va rassomchilik institutining drama teatri va kino fakultetini tamomlagan. Talabaligining oxirgi kursida rejissorlar e’tiboriga tushib, kinoga taklif qilingan.