TOShKENT, 15 yanv — Sputnik. Bugun, 15-yanvar kuni Tailandda o‘tayotgan futbol bo‘yicha U-23 Osiyo chempionatida 3-tur uchrashuvlari bo‘lib o‘tadi. O‘zbekiston Olimpiya terma jamoasi chorak final yo‘llanmasi uchun kurash olib boradi
O‘zbekistonlik futbolchilar uchinchi turda Janubiy Koreya jamoasiga qarshi bahs olib boradi. O‘yinni yaponiyalik Xiroyuki Kimura boshchiligidagi hakamlar brigadasi boshqarib boradi.
O‘yin Toshkent vaqti bilan soat 15:15 da boshlanadi. O‘zbekiston jamoasi oq rangli kiyimda harakat qilishadi.
Qayd etish joizki, ayni paytda Janubiy Koreya termasi 6 ochko bilan “S” guruhida yetakchilik qilmoqda va ular chorak final masalasini muddatidan oldin hal qilib bo‘lishgan. O‘zbekiston jamoasi esa 4 ochko bilan ikkinchi o‘rinda ketmoqda.
Eslatib o‘tamiz, birinchi o‘yinda Lyubinko Drulovich shogirdlari Eron terma jamoasiga qarshi 1:1 hisobida durang natija qayd etgan edi. Ikkinchi o‘yinni Xitoyga qarshi o‘tkazib, 2:0 hisobida ishonchli g‘alabaga erishgan edi.