TOShKENT, 16 dek — Sputnik. Rossiyadan qaytayotgan o‘zbekistonliklar Qozog‘istonda YTHga uchradi. Halokat oqibatida bir nafar o‘zbekistonlik halok bo‘ldi.
O‘zbekiston Tashqi ishlar vazirligi matbuot xizmati xabariga ko‘ra, YTH 13-dekabr kuni ertalab soat 9:30 larda Qarag‘anda viloyatining “Qarag‘anda—Balxash” avtomobil yo‘lida sodir bo‘lgan. Yuz bergan to‘qnashuv oqibatida bir nafar O‘zbekiston fuqarosi bo‘lgan I.Y.ning vafot etgan. Qolgan uch nafar fuqaro (A.Y., V.K. va H.A.) jarohatlanib, kasalxonaga yotqizilgan.
Ayni damda holat yuzasidan Qarag‘anda viloyati yo‘l politsiyasi tergov ishlarini olib bormoqda.
Konsullik-huquqiy departamenti zarur hollarda Qozog‘istonning Nur-Sulton shahri, Aqmola, Shimoliy Qozog‘iston, Pavlodar, Qo‘stanay va Qarag‘anda viloyatlarida bo‘lib turgan fuqarolar mamlakatning Nur-Sulton shahridagi elchixonasi raqami (+7-717-295-42-52)ga murojaat qilishlari mumkinligini eslatib o‘tgan.