TOShKENT, 29 okt - Sputnik. O‘zbekiston Energetika vazirligi, Koreya energetika agentligi va SK Engineering & Construction kompaniyasi o‘rtasida Muborak issiqlik elektr stansiyasini modernizatsiyalash loyihasining texnik-iqtisodiy asosini ishlab chiqish bo‘yicha Anglashuv memorandumi imzolandi, deb xabar qiladi tashkilot matbuot xizmati.
Hujjat o‘zbek delegatsiyasining Seuldagi Qayta tiklanuvchi energiya manbalari sakkizinchi xalqaro konferensiyasidagi ishtiroki doirasida imzolandi.
Unga ko‘ra, koreya tomoni Muborak IESda qazish, investitsiya va moliyalashtirish ishlarini bajarishga, shuningdek, stansiyaning kelgusi boshqaruvini davlat-xususiy sherikchilik sharti asosida amalga oshirishga tayyorligini bildirgan.
Ma’lumot uchun: SK Engineering & Construction kompaniyasi Koreya Respublikasida yillik kapital aylanmasi 213 mlrd AQSh dollarini tashkil qiluvchi va 2018-yil yakuniga ko‘ra, 23,8 mlrd AQSh dollarida sof foydaga ega bo‘lgan, hajm jihatdan eng yirik uchinchi kompaniya hisoblanadigan SK Group tarkibiga kiradi.