TOShKENT, 10 okt – Sputnik. Ushbu yilning 9 oyida O‘zbekistonda xalqaro pul o‘tkazmalari umumiy hajmi - 5,2 milliard dollarga yetdi. Shundan 4,5 mlrd. $ - jismoniy shaxslardan O‘zbekistonga kelib tushgan pullar va 0,8 mlrd $ – xorijga yuborilgan pullar, deb xabar qilmoqda Markaziy bank.
“Xalqaro pul o‘tkazmalari orqali respublikamizga kirib kelgan valyuta mablag‘lar hajmi o‘tgan yilning shu davriga nisbatan 18% ga oshdi”, - deyilgan xabarda.
Eslatib o‘tamiz, 2018-yil yanvar-sentabr oyida O‘zbekistonda yuborilgan valyuta miqdori 3,8 mrld. Dollarni tashkil qilgan edi.
Shuningdek, Markaziy bank O‘zbekiston ichki valyuta bozori 2019-yilning 9 oyida 1,3 baravar o‘sganini xabar qildi.
“2019 yilning 9 oyi davomida ichki valyuta bozorida yuridik va jismoniy shaxslar tomonidan amalga oshirilgan valyuta oldi-sotdi operatsiyalarining jami aylanma hajmi 24,3 mrld. AQSh dollarini tashkil etib, o‘tgan yilning mos davridagi ko‘rsatkichga (18,3 mrld. doll.) nisbatan 1,3 barobarga oshdi”, - deyilgan xabarda.
Bank xabarida aytilishiga ko‘ra, ichki bozorda valyutaga bo‘lgan talab (7,7 mld) taklifdan (4,8 mlrd) ko‘ra ko‘proq bo‘lgani tufayli Markaziy bank tomonidan qo‘shimcha valyuta intervensiyalari bo‘lib turgan.