TOShKENT, 8 okt – Sputnik. Toshkentda avtomobil oynasidan axlat tashlagan haydovchi 2 230 000 so‘mga jarimaga tortildi. Bu haqida “Voditeli Tashkenta” guruhi xabar qilmoqda.
Xabarda aytilishiga ko‘ra, voqea 29-sentabr kuni sodir bo‘lgan. Svetoforda to‘xtab turgan avtomobil oynasidan axlat ko‘chaga otib yuborilganini uning orqasida turgan avtomobil videoregistratori kamerasiga tushib qolgan.
YHXBda ushbu videoga qonuniy baho berishgan va haydovchi O‘zbekiston Respublikasi Ma’muriy javobgarlik kodeksining 147 moddasining 1 qismiga asosan (Yo‘l inshootlariga, yo‘l harakatini tartibga solib turuvchi texnik vositalarga shikast yetkazish - EKIHning 10 baravari miqdorida) - 2 230 000 so‘mga jarimaga tortilgan.
Ayni damda ushbu xabar guruhda qizg‘in muhokama bo‘lmoqda. Ba’zi haydovchilar ushbu vaziyatda MJKning noto‘g‘ri bandi qo‘llanilgan, aslida 123-modda. (Transport vositalaridan axlat yoki boshqa narsalarni tashlab yuborish) qo‘llanilishi kerak edi deyishmoqda. Ushbu bandga ko‘ra haydovchi EKIHning 1 baravarigacha jarimaga tortilishi mumkin.
Lekin Feysbukda ushbu post ostiga qoldirilgan izohlarga ko‘ra, aksariyat haydovchilar ko‘chani ifloslantirayotgan haydovchilarga nisbatan yanada qattiqqo‘l jazolar qo‘llash tarafdoridir.