TOShKENT, 21 sen - Sputnik. O‘zbekiston Respublikasida arxiv ishi va ish yuritishni takomillashtirish chora-tadbirlari to‘g‘risida prezident Farmoni qabul qilindi.
Farmonga ko‘ra, Vazirlar Mahkamasi huzuridagi "O‘zarxiv" agentligi negizida O‘zbekiston Respublikasi "O‘zarxiv" agentligi tashkil etildi.
Shuningdek, Farmonga muvofik 2020-yil 1-iyungacha davlat arxivlarida saqlanayotgan tarixiy davr (1917 yilgacha) arxiv hujjatlarini o‘rnatilgan tartibda maxfiylikdan chiqariladi.
2020 yil 1-iyungacha quyidagi davlat xizmatlari Davlat xizmatlari markazlari va YaIDXP orqali ko‘rsatilishi joriy etiladi:
👉 o‘qiganlikni tasdiqlash haqidagi arxiv ma’lumotnomasini berish;
👉 ish stajini tasdiqlash haqidagi arxiv ma’lumotnomasini berish;
👉 ish haqini tasdiqlash haqidagi arxiv ma’lumotnomasini berish;
👉 arab alifbosida yaratilgan turkiy, forsiy va arabcha hujjatlardagi axborotlar bo‘yicha annotatsiya ma’lumotlarini tayyorlab berish;
👉 arxiv hujjatlari, kitoblar va qo‘lozmalarni raqamlashtirish (elektron nusxa olish).
Mazkur arxiv ma’lumotnomalarini berish bo‘yicha davlat xizmatlari ko‘rsatilganligi uchun yig‘im undirilmaydi.