TOShKENT, 20 avg – Sputnik. Markaziy bank raisi Mamarizo Nurmurotov O‘zbekiston milliy valyutasi - so‘mning denominatsiya qilinishi haqida o‘z fikrlarini aytdi.
Bu haqda Adliya vazirligining “Huquqiy axborot” kanali xabar qildi.
“Denominatsiya oddiygina nollarni o‘chirish emas, katta iqtisodiy xarajat. Biz denominatsiya qilmoqchi emasmiz. Markaziy bank raisi sifatida aytmoqchiman, denominatsiya hech kimning xayolida yo‘q.
Denominatsiya iqtisodiy barqarorlik va kuchli inflyatsiya sharoitida o‘tkaziladi. Bizda ahvol unday emas”, - deb ta’kidladi Markaziy bank raisi.
Eslatib o‘tamiz, 2017-yil 22-avgustida O‘zbekistonda 50 ming so‘mlik, 2019-yil 25-fevralida – 100 ming so‘mlik banknotalar muomalaga kiritilgan edi.
Ma’lumot uchun: denominatsiya bu – moliyaviy islohotning bir turi bo‘lib, u valyuta nominal qiymatini kamaytirishni, bin necha eski namunadagi qog‘oz pul o‘rniga 1 ta yangi namunadagi banknota ishlatishni nazarda tutadi. Masalan, Rossiyada 1998-yilda o‘tkazilgan denominatsiyada 1000 rubl 1 rublga tenglashtirilgan edi.