TOShKENT, 31-iyul – Sputnik. Xalqaro tiklanish va taraqqiyot banki ishtirokida “O‘rta shaharlarni kompleks rivojlantirish” loyihasini amalga oshirishga doir chora-tadbirlar to‘g‘risidagi prezident qarori qabul qilindi.
Mazkur loyihani amalga oshirish uchun Xalqaro tiklanish va taraqqiyot banki (XTTB) O‘zbekistonga 100 million AQSh dollari miqdorida qarz mablag‘larini taqdim etgan.
Loyiha doirasidagi tajriba-sinov shaharlari sifatida Yangiyo‘l (Toshkent viloyati), Kogon (Buxoro viloyati) va Chortoq (Namangan viloyati) belgilangan.
Qarorga muvofiq:
- Investitsiyalar va tashqi savdo vazirligi loyihaning o‘z vaqtida amalga oshirilishi, shuningdek, XTTB qarz mablag‘laridan maqsadli va samarali foydalanish uchun mas’ul ijro etuvchi organ hisoblanadi;
- loyihani amalga oshirishni umumiy muvofiqlashtirish Investitsiyalar va tashqi savdo vazirligi hamda Iqtisodiyot va sanoat vazirligi huzuridagi Urbanizatsiya agentligi tomonidan amalga oshiriladi.
Qaror bilan quyidagilar tasdiqlandi:
- Loyihaning asosiy texnik-iqtisodiy parametrlari;
- Loyihani amalga oshirish uchun jalb etilgan XTTBning qarz mablag‘lari bo‘yicha asosiy qarzni so‘ndirish, foizlar va vositachilik haqini to‘lashning prognoz grafigi;
- 2019-2021 yillarda mazkur loyihani amalga oshirishga doir “Yo‘l xaritasi” .
Shuningdek, loyihani amalga oshirish bo‘yicha ishchi komissiya tuzilib, u loyihani samarali amalga oshirish, “Yo‘l xaritasi”da ko‘zda tutilgan chora-tadbirlarni jadal ishlab chiqish va obyektlarni tezkorlik bilan ishga tushirishni ta’minlaydi.
Har chorakda Prezident Administratsiyasi va Vazirlar Mahkamasiga loyihaning amalga oshirilishi to‘g‘risida axborot kiritiladi.