TOShKENT, 6-iyul — Sputnik. O‘zbekiston bosh vaziri Abdulla Aripov va RF hukumat rahbari Dmitriy Medvedev 10-iyul kuni Moskvada uchrashishadi, deb xabar berdi Rossiya hukumati matbuot xizmati.
Rossiya hukumati raisi Dmitriy Medvedev O‘zbekiston Respublikasi bosh vaziri Abdulla Aripov bilan 10-iyul kuni Moskvada muzokara o‘tkazadi. Uchrashuv davomida vazirlar savdo, investitsiya va madaniy-gumanitar hamkorlik masalalarini muhokama qiladilar.
Eslatib o‘tamiz, Rossiya hukumati rahbari Dmitriy Medvedev yaqinda O‘zbekistonga kelgan edi. Tashrif davomida Rossiya bosh vaziri O‘zbekiston prezidenti Shavkat Mirziyoyev bilan uchrashgan, shuningdek, Rossiya-O‘zbekiston hukumatlararo komissiyasi yig‘ilishida ishtirok etgandi. Uchrashuv yakunida ikki davlat hukumatlari o‘rtasida hamkorlikka oid kattagina hujjatlar paketi imzolangan.