TOShKENT, 24-iyun – Sputnik. Qo‘qon universitetini tashkil etish to‘g‘risida hukumat qarori umumiy muhokamaga qo‘yildi.
“Oliy va o‘rta maxsus ta’lim vazirligi hamda “Da Vinci” MChJning Qo‘qon shahrida davlat-xususiy sherikchiligi asosida nodavlat ta’lim xizmatlari ko‘rsatuvchi Qo‘qon universitetini tashkil etish to‘g‘risidagi taklifi qabul qilinsin”, - deyilgan loyihada.
Universitet faoliyatining asosiy vazifalari va faoliyati yo‘nalishlari:
Universitetda O‘zbekiston oliy ta’lim dasturlari bilan birga dunyoning nufuzli xorijiy oliy ta’lim muassasalarining oliy ta’lim dasturlarini joriy etish;
respublika iqtisodiyoti real sektorlari tarmoqlarining ehtiyojlarini hisobga olgan holda yuqori malakali oliy ma’lumotli mutaxassislarni tayyorlash;
xorijning ilg‘or oliy ta’lim muassasalari bilan hamkorlik asosida tajriba almashish dasturlarini amalga oshirish;
o‘quv rejalariga zamonaviy fanlarni kiritib borish, innovatsion hamda ilm-fanga asoslangan texnologiyalarni tatbiq qilish;
ta’lim jarayoniga zamonaviy pedagogik va axborot-kommunikatsiya texnologiyalarini, ilm-fan va texnikaning yangi yutuqlarini joriy etish;
ta’lim jarayoniga xorijiy oliy ta’lim muassasalari professor-o‘qituvchilari, olim va mutaxassislarini keng jalb etish;
professor-o‘qituvchilar malakasini oshirish va qayta tayyorlash, shu jumladan ularning malakaviy amaliyotini yetakchi xorijiy oliy ta’lim va ilmiy-tadqiqot muassasalarida tashkil etish;
universitetni zamonaviy laboratoriyalar, zamonaviy o‘quv va ilmiy adabiyotlar va axborot-kommunikatsiya texnologiyalari bilan ta’minlash.
Loyihada qayd etilishicha, 2023-yil 1-yanvarga qadar universitet barcha turdagi soliqlarni to‘lashdan; universitetga jalb etiladigan xorijiy professor-o‘qituvchilar va mutaxassislar yagona ijtimoiy to‘lovni va jismoniy shaxslarning daromadlaridan olinadigan soliqni to‘lashdan; olib kelinadigan, O‘zbekistonda ishlab chiqarilmaydigan uskunalar, kompyuter texnikasi, elektron doskalar, proyektorlar, multimedia mahsulotlari, adabiyotlar, qurilish materiallari va inventar bojxona to‘lovlaridan ozod qilinadi.