TOShKENT, 9 apr – Sputnik. "Turin Invest Engineering" kompaniyasi "O‘zbekkino" uchun maxsus ko‘chma kinoteatr avtomobillari ishlab chiqdi.
Damas asosida ishlab chiqilgan ushbu avtomobillar mamlakatning kinoteatrlar mavjud bo‘lmagan olis tumanlarida kino ko‘rsatishga mo‘ljallangan.
Ko‘chma kinoteatr kinoproyektor, audio kolonkalar, akkumulyator batareyalari, noutbuk, DVD-proigrivatel va boshqa videomateriallarni avtonom ravishda translyatsiya qilish uchun zarur jihozlar bilan ta’minlangan.
Ushbu ixtisoslashtirilgan avtomobillar Turin Politexnika universiteti qoshidagi "Turin Invest Engineering" kompaniyasi tomonidan ishlab chiqilgan. Turin Invest turli muhandislik g‘oyalarini amalga oshirish bilan shug‘ullanadi.
Bundan oldin ular Spark avtomobilini to‘liq elektromobilga aylantirish, avtomobilda joylashtirilgan magazin va ofis kabi loyihalarni ishlab chiqishgan edi.