TOShKENT, 26 mar — Sputnik. O‘zbekiston bosh vaziri Abdulla Aripov va Rossiya hukumati raisi Dmitriy Medvedev 2019-yil may oyi oxirlarida O‘zbekistonda Qo‘shma komissiyaning birinchi majlisini hukumat rahbarlari darajasida o‘tkazishga kelishib olishdi.
Rossiya hukumati rahbari matbuot xizmatinining ma’lum qilishicha, tomonlar 25-mart kuni telefon orqali muloqot o‘tkazdi.
Abdulla Aripov va Dmitriy Medvedev O‘zbekiston-Rossiya savdo-iqtisodiy va ilmiy-texnikaviy hamkorligining dolzarb masalalari, shuningdek, ikki davlat hukumat rahbarlari darajasida 2019-yil may oyi oxirlarida O‘zbekistonda bo‘lib o‘tishi rejalashtirilgan Qo‘shma komissiya majlisiga tayyorgarlikni muhokama qilgan.
O‘zbekiston va Rossiya hukumat rahbarlari darajasida Qo‘shma komissiya O‘zbekiston prezidenti Shavkat Mirziyoyev hamda Rossiya prezidenti Vladimir Putin o‘rtasidagi muzokaralar yakuni bo‘yicha 2018-yil oktabr oyida, savdo-iqtisodiy hamkorlikni kuchaytirish bo‘yicha sa’y-harakatlarni muvofiqlashtirish maqsadida tashkil etilgan.