TOShKENT, 21 fev — Sputnik. Qozog‘iston prezidenti Nursulton Nazarboyev hukumat iste’foga chiqishi kerak deb ma’lum qildi. Davlat rahbarining bayonoti Oq o‘rdaning rasmiy saytida e’lon qilindi.
Nazarboyev Qozog‘istonda barcha zaruriy davlat loyihalari, jumladan, industrial, ijtimoiy, infratuzilma, sog‘liqni saqlash va ta’limni rivojlantirish qabul qilinganini aytib o‘tdi. Ammo ish tizimi shu kunga yo‘lga qo‘yilmagan deb hisoblaydi.
Nazarboyevning so‘zlariga ko‘ra, aholining real daromadi oshmayapti. Oila budjetida oziq-ovqat mahsulotlariga sarflanayotgan mablag‘ o‘sishda davom etmoqda.
“Buning hammasi hukumati a’zolari, vazirlar, akimlarning aholi bilan ishlay olmasligi, odamlar muammosini tinglay olmasligi, olib borilayotgan ish va siyosatni tushuntira olmasliklari bois yuzaga kelmoqda. Shu boisdan men, Prezident va Konstitutsiya garovi sifatida, xalqimizning manfaatlarini inobatga olgan holda, quyidagi qarorni qabul qilaman. Hukumat iste’foga chiqishi kerak deb hisoblayman”, - deya ma’lum qildi Nazarboyev.
Eslatib o‘tamiz, avvalroq Qozog‘iston prezidenti Nursulton Nazarboyev respublikada muddatidan oldin prezident saylovlari bo‘lmasligini ma’lum qilganligi haqida xabar qilgan edik.