TOShKENT, 19 fev — Sputnik. O‘zbekistonda 8-sinf o‘quvchisi 11,3 million so‘m va mobil telefon o‘g‘irlaganlikda gumonlanmoqda. Bu haqda O‘zbekiston IIV Jamoatchilik va ommaviy axborot vositalari bilan aloqalar boshqarmasi xabar qildi.
“2018 yil 6-dekabr kuni Qashqadaryo viloyatining Dehqonobod tumanida yashovchi N.A. IIBga murojaat qilib, unda 2018-yil 16-noyabrga o‘tar kechasi noma’lum shaxs uning Navobod qishlog‘ida joylashgan do‘koniga deraza oynasini sindirish yo‘li bilan kirib, u yerdan 11 300 000 so‘m puli va “Samsung” rusumli mobil telefonini o‘g‘irlab ketganligini ma’lum qilgan”, - deyiladi xabarda.
Qayd etilishicha, holat yuzasidan jinoyat ishi qo‘zg‘atilgan. Ko‘rilgan choralar natijasida ushbu jinoyatni Navobod qishlog‘ida yashovchi, 21-sonli o‘rta maktabning 8-sinf o‘quvchisi sodir etganligi aniqlanib, ushlangan.
Hozirda tergov harakatlari davom etmoqda.